The Kentish Hymn

Verse Indeterminate Saxon

Wuton wuldrian         weorada dryhten
halgan hlioðorcwidum,         hiofenrices weard,
lufian liofwendum,         lifæs agend,
and him simle sio         sigefæst wuldor

5

uppe mid ænglum,         and on eorðan sibb
gumena gehwilcum         goodes willan.
We ðe heriað         halgum stefnum
and þe blætsiað,         bilewit fæder,
and ðe þanciað,         þioda walden,

10

ðines weorðlican         wuldordreames
and ðinra miclan         mægena gerena,
ðe ðu, god dryhten,         gastes mæhtum
hafest on gewealdum         hiofen and eorðan,
an ece fæder,         ælmehtig god.

15

ðu eart cyninga cyningc         cwicera gehwilces,
ðu eart sigefest sunu         and soð hælend
ofer ealle gescæft         angla and manna.
ðu, dryhten god,         on dreamum wunast
on ðære upplican         æðelan ceastre,

20

frea folca gehwæs,         swa ðu æt fruman wære
efeneadig bearn         agenum fæder.
ðu eart heofenlic lioht         and ðæt halige lamb,
ðe ðu manscilde         middangeardes
for þinre arfæstnesse         ealle towurpe,

25

fiond geflæmdest,         follc generedes,
blode gebohtest         bearn Israela,
ða ðu ahofe         ðurh ðæt halige triow
ðinre ðrowunga         ðriostre senna,
þæt ðu on hæahsetle         heafena rices

30

sitest sigehræmig         on ða swiðran hand
ðinum godfæder,         gasta gemyndig.
Mildsa nu, meahtig,         manna cynne,
and of leahtrum ales         ðine ða liofan gescæft,
and us hale gedo,         heleða sceppend,

35

niða nergend,         for ðines naman are.
ðu eart soðlice         simle halig,
and ðu eart ana         æce dryhten,
and ðu ana bist         eallra dema
cwucra ge deadra,         Crist nergende,

40

forðan ðu on ðrymme ricsast         and on ðrinesse
and on annesse,         ealles waldend,
hiofena heahcyninc,         haliges gastes
fegere gefelled         in fæder wuldre.