The Paris Psalter: Psalm 112

Verse Indeterminate Saxon

Herigean nu cnihtas         hælynd drihten,
and naman dryhtnes         neode herigan.
Wese nama dryhtnes         neode gebletsad
of ðyssan forð         awa to worulde.

5

Fram upgange         æryst sunnan
oðþæt heo wende         on westrodur
ge sculon dryhtnes naman         dædum herigean.
He is ofer ealle         ingeþeode
se heahsta         hæleða cynnes,

10

is ofer heofenas eac         ahafen his wuldur.
Hwylc ys anlic         urum dryhtne,
þam halgan gode,         þe on heofonrice
eadig eardað,         ofer ealle gesyhð,
þa eadmedu         æghwær begangæð

15

on eorðwege,         up on heofenum?
He of eorðan mæg         þone unagan
weccan to willan,         and of woruftorde
þone þearfendan         þriste areccan,
And hine on ealdordom         upp asettan

20

his folces fruman         on fæger lif.
Se þe eard seteð         unwæstmbærre
on modor hus         manigra bearna;
hio ofer hire suna         symblað and blissað.