The Paris Psalter: Psalm 117

Verse Indeterminate Saxon

Ic andette         ecum dryhtne
þam godan gode;         ic hine gleawne wat;
ys his mildheortnys         mycel to worulde.
þæt Israela cwæðan         ealle nu ða,

5

þe he is se goda god,         and gearu standeð
his mildheortnys         mære to worulde.
Cweðe Aarones hus         eac þæt sylfe;
he ys se goda god,         and gearu standeð
his mildheortnys         mære to worulde.

10

Cweðan ealle þæt         unforcuðe,
þe him on standeð         egsa dryhtnes;
forðon he ys se goda god,         and gearu standeð
his mildheortnys         mære on worulde.
Ic on costunge         cigde to dryhtne,

15

and he me gehyrde         on heare brædu.
Nu me fultum is         fæle dryhten,
nis me ege mannes         for ahwæðer.
Nu me fultum ys         fæle dryhten,
ic fracuþe forseo         feondas mine.

20

God ys on dryhten         georne to þenceanne,
þonne on mannan wese         mod to treowianne.
God ys on dryhten         georne to hyhtanne,
þonne on ealdormen         ahwær to treowianne.
Ealle me ymbsealdon         side þeode,

25

and ic wæs on dryhtnes naman         deorum gehæled.
Me ymbstodan         strange manige,
and me godes nama on him         georne gehælde.
þa hi me ymbsealdon         samod anlice
swa beon bitere,         oððe þu bærne eac

30

þornas þyre         þicce fyre,
þær me nama dryhtnes         neode scylde.
Ic wæs hearde cnyssed         and ic me helpe fand,
þæt ic fæste ne feoll,         ac ic me frofre begeat,
þa me dryhten onfeng,         swa hit gedefe wæs.

35

Me wæs strengðu strang         stiþ on dryhtne
and herenes heah,         and he me eac
ys a to worulde         worden on hælu.
A byð blisse stefn         beorht gehyred
on soðfæstra         swæsum muðe.

40

Dyde gedefe mægen         dryhtnes swyðre,
and me seo swyðre         swylce drihtnes
ahof hrædlice         æt heahþearfe.
Ne swelte ic mid sare,         ac ic gesund lifige
and weorc godes         wide secge.

45

Se clænsude,         se þe him clæne wæs;
dryhten ælmihtig         nolde to deaðe me
on ecnysse         æfre gesyllan.
Undoð me sniome duru         soðfæstra eac,
þær ic gange inn,         gode andette;

50

soðfæste on þa duru         seceað inngang.
Ic þe andette,         ece dryhten,
forðon þu me gehyrdest         æt heahþearfe
and me þa gewurde         wis on hælu.
þone sylfan stan         þe hine swyðe ær

55

wyrhtan awurpan,         nu se geworden is
hwommona heagost;         halig dryhten
to wealles wraðe         wis teofrade;
þæt is urum eagum         eall wundorlic.
þis ys se dæg         þe hine drihten us

60

wisfæst geworhte         wera cneorissum,
eallum eorðtudrum         eadgum to blisse.
Eala þu dryhten god,         do me halne;
eala þu dryhten min,         do us gesunde.
Gebletsad is, se þe com         ofer bearna gehwylc

65

on dryhtnes naman         dædum mærum;
we eow æt godes huse         gearwe bletsiað,
nu us drihten god         deore onlyhte.
Wutan us to symbeldæge         settan georne,
and ðone gelome         lustum healdan

70

oð wigbedes         wræste hornas.
þu eart min dryhten god,         and ic dædum þe
ecne andette;        
þu eart min hælend god,         and ic herige ðe.
Ic ðe andette         ecne dryhten,

75

forðon þu me gehyrdest         æt heahþearfe,
and þa wurde me         wis to hælu.
Eac ic andette         eceum dryhtne,
forðon he ys se goda god,         and ic ful geare wat,
þæt þin mildheortnyss         ys mycel to worulde.