The Paris Psalter: Psalm 122

Verse Indeterminate Saxon

To þe ic mine eagan hof,         ece drihten,
þu þe heofonhamas         healdest and wealdest.
Efne mine eagan synt         ealra gelicast
þonne esne bið,         þonne ondrysnum

5

his hlaforde         hereð and cwemeð.
And swa eagan gað         earmre þeowenan,
þonne heo on hire hlæfdigean         handa locað,
swa us synt eagan to ðe,         ece drihten,
urum þam godan gode;         geare lociað,

10

oþþæt us miltsige         mihta wealdend.
Miltsa us nu ða,         mihtig drihten,
miltsa us swylce,         forþon we manegum synt
forhogednessum         hearde gefylde.
And we manegum synd         manna wordum

15

ure sawl         swiðe gefylled
mid edwite,         oft and geneahhe,
and us oferhydige forseoð         oft and gelome.