The Paris Psalter: Psalm 123

Verse Indeterminate Saxon

Nymþe us on wese         ece drihten,
cweþað Israhelas         ealle nu ða,
nymþe us eardige on         awa drihten,
þonne us manfulle         menn onginnað;

5

wen is, þæt hi us lifigende         lungre wyllen
sniome forsweolgan,         gif hi swa magon.
þonne us ðara manna         mod yrsade,
and us wiðerwearde         wæron geneahhe;
wen is, þæt hi us woldan         wætre gelice

10

sona gesupan,         gif hit swa wolde.
Oft ure sawl         swyþe frecne
hlimman gedegde         hludes wæteres;
wene ic forþon,         þæt heo wel mæge
þæt swyðre mægen,         sawel usser,

15

wæteres wenan         ðæs wel gedegean.
Drihten si gebletsad,         þe þæt ne dyde æfre,
þæt us on hearde         hæftnyd sealde
þam þe us mid toðum         toteon woldan.
Wærun ure sawla         samod anlice

20

niþa generede,         swa swa neodspearuwa
of grames huntan         gryne losige.
Grin bið on sadan         grame torænded,
and we synd alysde         lifes wyrðe;
we us naman drihtnes         neode habbað

25

on fultume         fæstne and strangne,
þæs þe heofon worhte,         hrusan swylce.