The Paris Psalter: Psalm 135

Verse Indeterminate Saxon

Eac ic andette         þam þe ece is
ealra godena god,         forðon ic hine godne wat.
Andette ic swylce         þam þe ealra is
drihtna drihten         dædum spedigast,

5

forðon he god is,         and ic gearwe wat,
þæt his mildheortnes         is mycel to worulde.
He wundur dyde         weorþlic ana.
Se heofon worhte,         hæleða andgit.
He eorðan æfter wæter         ærest sette.

10

He leohtfatu         leodum ana
micel geworhte         manna bearnum,
Sette on miht dæges         mære sunnan,
On miht nihte         monan and steorran.
He ægyptas sloh         and eall heora frumbearn,

15

And he Israhelas         ealle oðlædde
of ægyptum         ealle gesunde,
On mihtigre         mære handa
and on eallmihte         earmes swylce.
He readne sæ         recene todælde,

20

Lædde Israhelas         ealle þurh midne.
þær Pharaon gefeol,         and his fæge werud
on þam readan sæ         recene forwurdan.
He gewealdendlice         þuruh westen eft
his þæt leofe folc         lædde swylce.

25

He of stanclife         stearce burnan
leodum lædde         on leofne þanc.
Swylce he acwealde         cyningas mycle.
And he eac ofsloh         æðele cyningas,
weras wræclice,         þa þe weoruld heoldan.

30

þær Seon cyning         swylt dreorig fornam,
þe Amorrea         anweald hæfde,
And Og swylce,         þe æror wæs
swyþe breme cyning         on Basane.
Sealde heora eorþan         on yrfeland,

35

And þæt yrfe         on Israele,
þe his esnas         agene wæron.
Forþon ure eaðmedu         ece drihten
gemyndgade,         and us mycel sealde.
And he us aferede         feondum of handa,

40

þa ðe wraðe         wæron ealle.
He eac afedeð         flæscea æghwylc.
Andetað nu ealle         þam ecean gode,
þe on heofonum is         heah eardiende.
And ge ealra godena gode         geara andettað,

45

forþan his mildheortnes         is mycel to worulde.