The Paris Psalter: Psalm 143

Verse Indeterminate Saxon

Drihten is gebletsad,         min se deora god,
þe mine handa         to hilde teah
and mine fingras         to gefeohtanne.
He is mildheortnes         min æt þearfe,

5

frið and fultum,         fæst andfengea
and alysend is         lifes mines.
Min þu mære eart         mihtig scyldend;
ic hiht on ðe         hæbbe fæste,
þæt þu me folc mænig         fægere underþeoddest.

10

Hwæt is se manna,         mihtig drihten,
þe þu him cuðlice         cyþan woldest,
oððe mannes sunu,         þæt hit gemet wære,
þæt þu him aht wið         æfre hæfdest?
Man byð merwe gesceaft,         mihtum idel;

15

beoð his dagas swylce         demde gelice,
swa þu on scimiendre         sceade locige.
Ahyld þine heofenas,         halig drihten,
onhrin þissum muntum,         and hi hraðe reocað.
þine ligetta         leohtað and beorhtað,

20

and þu hi toweorpest         wide æfter;
synd þine strele         strange swylce,
and ðu hi gedrefed hafast         deope syþþan.
Onsend þine handa         of heanessum,
alys me and genere         wið lagustreamum

25

manegum wæterum         and wið manfolmum
fremdra bearna         and frecenra.
þara muðas sprecað         manidel word,
bið hyra seo swiðre         symble abysgod,
þæt hi unrihtes         elne tiligeað.

30

Ic niwlice         niwne cantic
þam godan gode         gleawne singe
on psalterio,         þe him swynsað oft
mid tyn strengum         getogen hearpe,
on þære þe ic þe singe         swiþe geneahhe.

35

þu healdest and sylest         hælu cyningum;
þu alysdest eac         leofne Dauid,
þinne agenne         ombihtmæcg,
of þam awyrgedan         wraðan sweorde.
Alys me and oðlæd         laþum wætrum,

40

manegum merestreamum,         mærum handum,
þa me fremde bearn         fæcne syndan.
þara muðas sprecað         manidel word,
byð hyra seo swiðre         symble abysgad,
þæt hi unrihtes         awa tiligean.

45

þara bearn swylce         bogum æþelum
settum beamum         samed anlice,
standað on staðule         stiðe wið geoguðe.
Wærun heora dohtru         deore gesette
and ymb frætwum         utan gegyrede,

50

efne anlicast         æþelum temple.
Heora frumwæstme         fulle syndon,
þæt hi rumlice         roccettað swiðe,
of þissan on þæt         þonne wendað.
Heora sceap wærun         swylce tydred

55

and on siðfatum         swiþe genihtsum,
heora oxan eac         ungemete fætte.
Ne hreosað hi to hrusan         hearde gebiged,
ne þær fernes is         folca mænegum,
ne care micle         cleopiað on worðum.

60

Eadig bið þæt folc,         oðre hatað,
þe him swa on foldan         fægre limpeð;
eadig bið þæt folc         þe ælmihtig wile
drihten god         dema weorðan.