The Paris Psalter: Psalm 59

Verse Indeterminate Saxon

þu us todrife,         drihten user,
and us towurpe         geond werþeoda,
yrre us wurde         and eft milde.
Eorðan ðu onhrerdest,         ealle gedrefdest;

5

hæl hyre wunde,         nu heo ahrered is.
Feala ðu ætywdest         folce ðinum
heardra wisan         and hi hraþe æfter
mid wynsume         wine drenctest.
þu becnuncge         beorhte sealdest

10

þam þe ege ðinne         elne healdað,
þæt hi him gebeorgen         bogan and stræle
and wæron alysede         leofe þine.
Do me þin seo swyðre hand         symle halne;
gehyr me, halig god.         Hwæt, ðu holdlice

15

on ðinre halignesse         her aspræce:
"And ic blissie,         ba gedæle
Sicimam et Conuallem,         ða samod wæron
on Metiboris         mihtum spedige.
Min is Galaad,         gleaw Mannases

20

and Effrem ys         æðele strengþu
heafdes mines         her on foldan.
Cyninc ys me         Iuda cuð;
is me Moab         mines hyhtes hwer,
and ic aðenige eac         on Idumea,

25

min gescy sende,         and me syððan gedo
Allophilas         ealle gewylde."
Hwylc gelædeð me         leofran on ceastre
weallum beworhte?         Hwa wyle swylce me
in Idumea         eac gelædan?

30

Ac ne eart þu se sylfa god,         ðe us swa drife?
Ne ga ðu us on mægene,         mihtig drihten.
Syle us nu on earfoðum         æðelne fultum,
forðon hælu byð         her on eorðan
manna gehwylces         mægene idel.

35

Us sceal mægenes gemet         mihtig drihten
soðfæst syllan,         and he sona mæg
ure fynd gedon         fracoþe to nahte.