The Paris Psalter: Psalm 69

Verse Indeterminate Saxon

Wes, drihten god,         deore fultum;
beheald, drihten, me,         and me hraðe syþþan
gefultuma         æt feorhþearfe.
þonne beoð gescende         and scame dreogað,

5

þa þe mine fynd         fæcne wæron
and mine sawle         sohton mid niðe.
Hi on hinderlincg         hweorfað and cyrrað;
ealle hiora scamien,         þe me yfel hogedon.
And heora æfstu eac         ealle sceamien,

10

þe me word cwædon:         "Weg la, weg la!"
Habban þa mid wynne         weorðe blisse,
þa þe secean         symble drihten,
and symble cweðen:         "Sy þin miht, drihten!"
and þine hælu         holde lufigean.

15

Ic eom wædla         and worldþearfa;
gefultuma me, god,         frea ælmihtig.
þu me fultum eart         fæste, drihten,
eart alysend min;         ne lata þu awiht.