The Paris Psalter: Psalm 74

Verse Indeterminate Saxon

We þe andettað,         ecne drihten,
and þe andettað         ealle þeoda
and naman þinne         neode ciegen.
Ic þin wundur eall         wræclic sæcge,

5

swa ic fæstlicast mæg         befon wordum,
and eac soð         symble deme.
Eorðe is gemolten         and hire eardend mid;
ic þonne hire swyre         symble getrymme.
Ic to yflum cwæð         oft nalæs seldan:

10

"Nelle ge unriht         ænig fremman
and agyltan, þæt hi         ne gulpan þæs.
Ne ahebbað ge to hea         eowre hygeþancas,
ne ge wið gode æfre         gramword sprecan."
Forþon eastan ne cymeð         gumena ænig,

15

ne of westwegum         wera cneorissa,
ne of þissum westum         widum morum;
forþon him is dema         drihten sylfa.
Sumne he gehyneð,         sumne ahefeð sniome;
forþon se wines steap         on waldendes handa

20

fægere gefylled is;         þæs onfehð þe he ann.
þonne he of þysum on þæt         þonne oncerreð,
nyle he þa dærstan him         don unbryce;
forþam sculon ealle         drincan synfulle,
þa on þysse foldan         fyrene wyrceað;

25

ic þonne worulde gefean         wynnum healde,
and Iacobes gode         georne singe.
Ealra fyrenfulra         fyhtehornas
ic bealdlice         gebrece sniome;
swyþe beoð ahafene         þa soðfæstan.